Koko Makaku a bisti tur na seda
pa bai fiesta di makaku Babun.
Babun ta su mihó amigu,
awe nochi tur e cheknan lo kai pa Koko.
El a kana drenta fiesta yen di pikete.
Su sapatunan ta lombra manera un spil,
su flus di seda koló blou bèrdè,
un karson balòn hel bou di dje.
Su kabei el a plak ku pomada brilkrim,
su frenta ta lombra manera tutu di sebu.
Un brel di solo grandi riba su kabes,
un streki barbulètè ta choka su garganta.
Chimpansé ta pará na porta.
‘Koko, karnaval a pasa kaba, ta spil di palu bo tin na kas?’
Koko a gruña i pa e no daña e fiesta
el a disidí di sigui kana i bai laga Chimpansé.
Tras di bar Don Gorila ta traha komo bartènder,
e mihó bartènder ku tin den Kobá.
E ta meks un bibida ku e ta yama zumbi,
bo ta dal dos, drumi ronka te mañan.
‘Don ta awor mi a yega, unda mi por haña Babun?’
Don Gorila a mustra den direkshon di sala.
Babun ta pará ta papia ku dos beyesa,
dos hóben estilo di artista di sine.
Koko a sera su flus, kana bai serka nan.
‘Ahan, ata Koko, mi bon amigu, bosonan sera konosí kuné.
Koko, esaki ta Michi, anto esei ta Mèmè.’
Michi i Mèmè ta hari kuchikuchi
ora nan a mira e bistí di Koko.
Koko a interpretá esaki komo un apresio,
el ta sinti su mes Casanova en persona.
‘Ta un plaser i un honor di por sera konosí ku dos beyesa
ku por sierto por a kaba di baha en bibu for di pantaya blanku di sine
pa hasimi siegu ku nan bunitesa radiante, mi nòmber ta Koko Makaku.’
Michi i Mèmè no ta bin bei di harimentu,
awa ta kore for di nan wowo.
Babun a kana bai pushipushi
pa bai risibí e otro invitadonan.
Koko a sigui kana hasi su rònchi,
awor mas konvensí ainda di su bon bistí.
Mi ta bin bèk pa nan, el a pensa,
un di nan dos mester kai, mi no por hera.
‘Mi tata dushi,’ Michi a bisa Mèmè,
‘mi a kasi stek den mi harí.
Ta for di kua mondi e Shon Koko ei a sali,
bistí manera un luangu trastorná.’
Enriki Kriki su orkesta ta kla pa toka un piesa,
nan ta warda riba un siñal di Babun.
Ku pasonan elegante Babun a yega serka.
‘Amigu i amiganan, fiesta a kuminsá.’
Tur makaku a subi pista di baile.
Koko a pura pa pidi un di e dos damitanan.
Na kaminda el a topa Babun ku Michi na su brasa.
Ora el a yega, nèt Mèmè ta pasa ku Chimpansé.
Chimpansé a hari saka djente grandi.
Koko a sinti un gana di chok’é.
Chimpansé a kue Mèmè tene.
‘Koko, abo si a hera Michi, hera Mèmè.’
Koko a bira tur tristu
i un poko desepshoná,
maske el a bisti tur na seda,
ta Koko Makaku el a keda.
Músika a stòp i Enriki Kriki
a anunsiá ku awor e konkurso
di baile ta bai kuminsá,
tur makaku subi dansflur.
Tur makaku a subi ku nan pareha.
Koko a subi pista di baile su so.
Enriki Kriki a dal aden ku un fandanga.
Koko a baila manera un kachó ku a hole wesu.
Tur makaku a stòp pa mira Koko baila.
Michi i Mèmè a keda wak boka habrí.
Nan a disidí ku ta ku Koko so nan ke baila.
Koko a keda prònk manera un pouwis.
Kompader
