Kachi Michi

Kachi Michi, sali for di solo
bo koló no ta bastante skur?
ma mi yu ta ken bo por a sali
bo nanishi n’ ta di mi sigur

Kachi Michi, lubidá e fiesta
Sentro ‘i Bario si bo no por bai
yen di mucha mas mahos ku bo
nan mayornan tur ta den malai

Kachi Michi, drecha e kabei ei
mucha kla formá bo ta awor
wak un frei ku tin un poko moda
pa dunabo kos ku tin balor

Kachi Michi, rumbo pa Hulanda
pa bai traha leu den eksterior
kontentu ku porfin e por move
nan di na Hulanda ta tur kos por

Kachi Michi, poko tempu a pasa
el a bisa e no ta traha mas
i awor e yama Kaatje Miesje
kore kaya lubidá bai kas

Kachi Michi, riba un paranda
a bin dal den Jan van Alleman
wowo blou kabei blònt ku bon tipo
bendedó di droga den de Jordaan

Kachi Michi a anunsiá tur hende
no ta nada mi amor lo kambi’é
e ta hasi loke Jan ta bisa
hasta sinta den un kash’i glas p’é

Kachi Michi a sali na estado
su barika ta bunita i rondó
e porfin a realisá su soño
ya e yu tin yen atmiradó

Kachi Michi, ya ta shete luna
kasi loko di desesperashon
Jan di e no ta kria yu di puta
otro hende tin su atenshon

Kachi Michi no sa kiko hasi
e ta sin pariba sin pabou
el a fia sèn kumpra un pasashi
drenta avion bini bèk Kòrsou

Kachi Michi, aki bo n’ ta drenta
ku barika sin bo ta kasá
kiko e bisiñanan lo bisa
bo ta meskos ku un hende pasá

Kachi Michi ta lastra riba kaya
topa un amigu bieu di dje
Lagadishi chòler drogadikto
kla pará mesora pa yud’é

Kachi Michi ta trose di doló
Lagadishi a duna un man e mes
at’e yu a nase sano i salvo
wowo blou kabei las nanishi stret

Kachi Michi loko di legria
no por warda pa bai bèk su kas
ku su pòpchi ku lo drecha famia
no ta zundra Kachi Michi mas

Kompader