Elekshon

Shon Ki Kinikini un gran polítiko
a triunfá den elekshon
i pa kuater aña largu
e ta rei di den Kobá.
El a pone fiesta grandi
pa tur esnan k’ a vota p’e
bestianan di tur parti
a kue rumbo pa alab’é.
Warawara kontrinkante
sintá den palu ta meditá
kon e por traha un chake
ku apoyo di Bòchi Blòblò
pa bira rei pa maske un bia.
Ata Bòchi i Wan Yuana
tur dos bistí mané dos keke
na koló ‘i manteka dushi
bela haltu riba un hansha
den direkshon di den Kobá.
Wan i Bòchi mi amigunan
bosnan a kue mal direkshon
bosnan ku semper a apoyámi
bin skucha un bon chake
ku ta pone Shon Ki gana anochi
i pèrdè den mardugá.
Warawara nos bon amigu
Wan i Bòchi a kontestá
ta Shon Ki a gana e biaha akí
i ta bou ‘i su rabu nos ke ta
einan tin kos di djòdjò
polítika no konosé amistat.

Kompader