Bièrnè Santu

Mi a komprendé ku awendia
Bièrnè Santu a para bira un dia
di fiesta, di paranda i di goso
Kaminda di Krus a bira
kaminda di Santa Cruz
sali kas mainta tempran
pa haña un lugá den fresku
ku ta mirami pa porko
pasobra Ata mi Kurpa
a bira sparerib i pòrchòp
riba barbekiú bon hasá
Ata mi Sanger
a bira ròm San Pablo
un di mi apòstelnan por sierto
ku a konbertí despues ku mi
a mustr’é ta ken ta ken
pero pa bini bèk
tokamentu di muzik duru
na playa kant’i awa
kaminda no ta pòrnada
Bach a komponé Matthäus Passion
i mas di su músika di morto
ku otro palabra
henter e asuntu di karga un krus
subi seru di Kalvario
wanta insulto di poko sòldá
bistí na saya
unda ku un suplá mi por a
bonjour nan tur pa reino di satanas
i despues henter e komedia
di resusitá pa mi bai mi kas bèk
awèl tur e asuntunan ei tabata pòrnada
loke m’a bisa Tata
pero mener no kier a keremi
i awor e ta dunami rason
mihó mi a keda mi kas wak televishon.

Hesu Kristu (h.kristu@shelu.org)