Nonze su kantika di tambú

Est’un aña di mizeria
ku n’ tin hende pa want’é.
Ni muraya n’ ke tendemi,
lapilapi ku mi ta.

Krus t’abou mi mama dushi.
Tin Wansitu riba mesa.
Tin spiritu na mi skina,
te kachó ta kore bai.

Sentebibu na mi porta
no ke shi mi enemigu.
Lumbra blanku ku su huma
n’ yudami bati nan.

Pa mi rondia poko brio
watakeli m’a beb’é,
ma su aw’a lanta marga,
laga fuku hostiná.

Kuk’indjan pa wanta stoma,
kalalú pa den beran,
m’a sut’éle, sera wowo,
pero bòfi n’ ke tum’é.

Lo mi kamna ranka yerba
pa kabai di shon Simion
raspa salu kontr’i awa,
tra’ kalbas floriá na man.

Ata nan ta toka kachu,
pa mañan mi paga ple,
tira piki den baranka,
fish’i araña pa busá.

Resa Kredu pa mi muri.
Nonze n’ ta buriku mas.
Planta sia n’e buraku.
Waze di mi laga kai.

Pierre Lauffer