E invento enbano di Quicombio (Jac. Van Hattum)
Quicombio, e inanu kreativo a sostené su kabes ku su man robes miéntras e man drechi tabata sosegá riba un pida papel bashí.
E idea tabat’ei i dikon Quicombio tabata duda pa pon’é riba papel, e mes no tabata sa. Ta masha poko biaha e tabatin miedu di frakaso, pasobra tur kos ku e sugerí, semper bai tabata bon pensá i seriamente konsiderá. Antó awor un pensamentu maravioso a drent’é, un pensamentu asina puru, ku un rel di gratitut a pasa den dje pa e inspirashon. Solamente un posibel frakaso tabata pon’é duda ainda si e mester a lòs su pensamentu riba papel.
Quicombio, den temporada di sekura, a mira basta hende kai muri, i nunka el a yega di sinti tantu fèrdrit asina ku pa morto di e mucha hòmbernan yòn ku a sukumbí di dolónan teribel den e mondi kaminda e i su amigunan tabata biba. Quicombio a sinti manera su man tabata mará i esaki tabata kaba kuné.
Antó awor, diripiente, for di e deseo di hasi algu, for di e anhelo di siña hende kon reflekshoná, e pensamentu di liberashon a nase.
‘Ta awor mester aktua,’ Quicombio a pensa, ‘ta awor ta ora, djis akí ta muchu lat.’ I su man tabata baila riba e pida papel.
Riba un anochi friu den temporada di áwaseru el a invitá e inanunan na un reunion kolektivo.
Quicombio mes a splika e inanunan aglomerá, den kietut di e anochi friu, kon sufrimentu di humanidat a tok’é profundamente anto ku kasi sigur nan mes tambe tabata pena samsam kuné pa esaki. Ta for di esaki a nase e idea di manda humanidat un último mensahe di reflekshon, anto segun e, el a logra haña un manera pa alkansá henter humanidat.
El a konta kon el a imagin’é ku tur inanu lo uza e oro batí di palu grandi pa skirbi frase-, proverbio- i rimanan pasífiko pa laga bientu di nòrt, sùit, bientu di pariba i pabou karga tur e palabranan ei di sabiduría, reflekshon, konsuelo, amor humano i trankilidat hiba pa mundu henter. El a stimulá tur inanu pa duna un man pa kristalisá su idea, i esaki a emoshoná e inanunan asina tantu ku a reina un silensio profundo despues di su charla.
Djei a sigui un eksploshon di aktividat i tur inanu a mira e asuntu komo nan deber. For di e bukinan di humanidat nan tabata lesa palabra di sabiduría i beyesa, palabra ku tabata mes bieu ku humanidat mes. I e inanunan tabata drenta sali na kantidat den bibliotekanan grandi di universidatnan, den libreria, den kolekshonnan privá di amante di buki. Niun hende no tabata ripará nada, pasobra pa su manisé tur buki tabata nèchi na nan lugá i no a keda niun rasku di e inanunan atras.
Antó manera abeha, kargá ku miel di sabiduria humano, e inanunan tabata bolbe ku míles di sitado, verso, pensamentu i bèrdat den tur idioma di humanidat. Nan tabata bula subi tur palu, ku bòter di enk chikirititu kologá na nan garganta na kordonnan fini di oro. Anto riba e blachinan, e míles, e miones di blachinan, nan tabata skirbi palabra di sabiduría, beyesa, amor, toleransha, pas i felisidat.
Djei a yega e momentu di sinta warda e bientunan presentá. Miones di mensahe lo bula plama rònt mundu. I for di e kayanan di siudatnan rònt mundu te e kamind’i kabritunan di mas desolá, hende lo por a lesa palabra di reflekshon, propio sabiduría i beyesa di antaño. Anto e bientunan no a tarda.
Tur eksitá Quicombio i henter e pueblo di inanu a para mira kon e oro batí, stimulá pa rosea fuerte di bientu di tormenta a plama riba mundu henter i nan tur a kere ku awor sí liberashon di humanidat tabata hopi serka.
Pero…lamentablemente batayon di sòldá tabata marcha pasa riba e kayanan i bou di nan butsnan pisá palabra di salbashon mundial a para bira kachikachi pa kaba na sush’i kaya. I niun hende, ni un ser humano, ni sikiera unu, a logra kue un blachi den man. Ni un wowo so a logra span di asombro. Di e mionesnan di chèns ni sikiera un a logra su meta.
Quicombio i su amigunan a bira asina tristu ku n’ ta poko nan a yora. E temporada di awa ei, awa a bin abou na kantidat i e hendenan a remarká: ‘Esaki si t’un temporada di awa serio.’
Drs. Jorge G.R.Labadie Solano
Leiden, 10 di òktober 2007
Redakshon: Wernher Suares, Ini Statia
Kòrsou, 26 di òktober 2007
E idea tabat’ei i dikon Quicombio tabata duda pa pon’é riba papel, e mes no tabata sa. Ta masha poko biaha e tabatin miedu di frakaso, pasobra tur kos ku e sugerí, semper bai tabata bon pensá i seriamente konsiderá. Antó awor un pensamentu maravioso a drent’é, un pensamentu asina puru, ku un rel di gratitut a pasa den dje pa e inspirashon. Solamente un posibel frakaso tabata pon’é duda ainda si e mester a lòs su pensamentu riba papel.
Quicombio, den temporada di sekura, a mira basta hende kai muri, i nunka el a yega di sinti tantu fèrdrit asina ku pa morto di e mucha hòmbernan yòn ku a sukumbí di dolónan teribel den e mondi kaminda e i su amigunan tabata biba. Quicombio a sinti manera su man tabata mará i esaki tabata kaba kuné.
Antó awor, diripiente, for di e deseo di hasi algu, for di e anhelo di siña hende kon reflekshoná, e pensamentu di liberashon a nase.
‘Ta awor mester aktua,’ Quicombio a pensa, ‘ta awor ta ora, djis akí ta muchu lat.’ I su man tabata baila riba e pida papel.
Riba un anochi friu den temporada di áwaseru el a invitá e inanunan na un reunion kolektivo.
Quicombio mes a splika e inanunan aglomerá, den kietut di e anochi friu, kon sufrimentu di humanidat a tok’é profundamente anto ku kasi sigur nan mes tambe tabata pena samsam kuné pa esaki. Ta for di esaki a nase e idea di manda humanidat un último mensahe di reflekshon, anto segun e, el a logra haña un manera pa alkansá henter humanidat.
El a konta kon el a imagin’é ku tur inanu lo uza e oro batí di palu grandi pa skirbi frase-, proverbio- i rimanan pasífiko pa laga bientu di nòrt, sùit, bientu di pariba i pabou karga tur e palabranan ei di sabiduría, reflekshon, konsuelo, amor humano i trankilidat hiba pa mundu henter. El a stimulá tur inanu pa duna un man pa kristalisá su idea, i esaki a emoshoná e inanunan asina tantu ku a reina un silensio profundo despues di su charla.
Djei a sigui un eksploshon di aktividat i tur inanu a mira e asuntu komo nan deber. For di e bukinan di humanidat nan tabata lesa palabra di sabiduría i beyesa, palabra ku tabata mes bieu ku humanidat mes. I e inanunan tabata drenta sali na kantidat den bibliotekanan grandi di universidatnan, den libreria, den kolekshonnan privá di amante di buki. Niun hende no tabata ripará nada, pasobra pa su manisé tur buki tabata nèchi na nan lugá i no a keda niun rasku di e inanunan atras.
Antó manera abeha, kargá ku miel di sabiduria humano, e inanunan tabata bolbe ku míles di sitado, verso, pensamentu i bèrdat den tur idioma di humanidat. Nan tabata bula subi tur palu, ku bòter di enk chikirititu kologá na nan garganta na kordonnan fini di oro. Anto riba e blachinan, e míles, e miones di blachinan, nan tabata skirbi palabra di sabiduría, beyesa, amor, toleransha, pas i felisidat.
Djei a yega e momentu di sinta warda e bientunan presentá. Miones di mensahe lo bula plama rònt mundu. I for di e kayanan di siudatnan rònt mundu te e kamind’i kabritunan di mas desolá, hende lo por a lesa palabra di reflekshon, propio sabiduría i beyesa di antaño. Anto e bientunan no a tarda.
Tur eksitá Quicombio i henter e pueblo di inanu a para mira kon e oro batí, stimulá pa rosea fuerte di bientu di tormenta a plama riba mundu henter i nan tur a kere ku awor sí liberashon di humanidat tabata hopi serka.
Pero…lamentablemente batayon di sòldá tabata marcha pasa riba e kayanan i bou di nan butsnan pisá palabra di salbashon mundial a para bira kachikachi pa kaba na sush’i kaya. I niun hende, ni un ser humano, ni sikiera unu, a logra kue un blachi den man. Ni un wowo so a logra span di asombro. Di e mionesnan di chèns ni sikiera un a logra su meta.
Quicombio i su amigunan a bira asina tristu ku n’ ta poko nan a yora. E temporada di awa ei, awa a bin abou na kantidat i e hendenan a remarká: ‘Esaki si t’un temporada di awa serio.’
Drs. Jorge G.R.Labadie Solano
Leiden, 10 di òktober 2007
Redakshon: Wernher Suares, Ini Statia
Kòrsou, 26 di òktober 2007
posted by Roy Evers at 4:27 PM
0 comments:
Post a Comment
<< Home