Fiesta di pèrdèdó

Nos no ta rabiá, nos no ta fadá
Paso’ ta fiesta di pèrdèdó ta vislumbrá
Nos no ta kontentu, nos no ta vèrdrit
Paso’ ku pèrdèdó no tin nada di selebrá
Ni kiko ku pèrdèdó pretendé
E no tin nada bon pa ofresé
E no tin nada positivo di agregá
Nada útil di aportá
Na kousa di un pueblo mal engañá

No pa kibra ilushon di pèrdèdó
Ni pa amargá e fruta di su hasí
Ma Palabra di Señor ta atvertí
Tur obra hasí den skuridat lo sali na kla
I nada ku bo planta lo no prosperá
Ora bientu di ost kuminsá supla djis moderá
Destino di pèrdèdó lo keda seyá
Kualkier mata ku e planta lo seka haña su fin
Paso’ raisnan lo buska awa kaminda no tin
Ta warda nos lo tin di warda sosegá
Danki Dios pasenshi nos pueblo no sa terminá

Paso’ otro añ’ ku Dios ke atrobe tin elekshon
E or’ ei pueblo lo ratifiká su posishon
Pèrdèdó nunka mas lo no lanta kabes
Pèrdèdó lo no tin nada di bin buska despues
Asina ta, pura bo hasi loke bo ta bo intenshon
Pura bo kobra bo trinta monedanan di traishon
Bo paga pa bo fiesta di maldishon
Pèrdèdó, boso nòmber lo mi no menshoná
No pa miedu, ... boso mes sa ken boso ta

Anto otro añ’ ta belorio di pèrdèdó nos tur lo bai
Paso’ otro añ’ si, no tin kuestion
Pa pèrdèdó lo no tin ni banki di oposishon
Otro añ’ ta Santana mes lo akomodá
Tantu polítiko komo partidonan frakasá
E votadó ta bai hasi un limpiesa total
Pa dignidat reina riba tereno gubernamental
Pèrdèdó, boso nòmber lo mi no menshoná
No pa miedu, ... boso mes sa ken boso ta

HENK RHUGGENAATH
Curaçao