Un kuenta kòrtiku pa mucha (3)

Serapio, un sapu rondó gordo, un tata
di famia respetá, tin tres dia sin bin kas,
algu ku nunka a pasa. E sa keda
sin bin kas un te dos dia tin bia, ora
e kue kaya ku su amigu Enriki Kriki pa
bai kanta den mondi di Mansaliña,
(e ta kanta báritòn den orkesta
di Enriki Kriki), anto solo sali di sorpresa
i di dia kla habri nan den mondi di Mansaliña,
pone ku nan no por krusa Saliña
i kue kaminda di kas, pa no resultá
riba mesa di desayuno di Shon Ki
Kinikini o den wea di sòpi di Wawa
Warawara, ámbos un fin ménos agradabel
i tristu pa dos sapu ku ta gosa di nan bida.

Chepa, kasá di Serapio, ta masha preokupá
i bisiñanan a laga sa, ku chuchubi a kanta
ku Chapo, pasó asina nan ta yama
Serapio den mondi di Mansaliña, a topa
ku un kokí di pariba di Saliña i ku e ta lokamente enamorá.
Awor ta asina ku no ta tur kos ku chuchubi kanta
mester kere, mala lenga ta bisa ku chuchubi ta flùit
lokual sierto bestianan ke tende i hasta ta ser pagá
pa flùit malu di bestia inosente.

Pues Chepa lo no a kere nada di e hasimentu di redu
si e no a haña notisia di Serapio mes ku a manda bisa
ku el a topa un kokí ku ta kanta manera un para di misa,
un beyesa mané no tin dos ni den mondi di Mansaliña
ni den Saliña i ku Chepa por lora tur su paña
den un bònder i manda nan pariba di Saliña.
Chepa a laga kontestá ku si e ke su paña
e mes bin buska nan i ku e tin sigur ku promé
ku gai kanta tres biaha, Serapio lo kanta
otro kansion i lo kòrda riba su kriaturanan.

Lástimamente pariba di Saliña no tin galiña
te pa tin gai te pa e gai kanta tres biaha,
pues Chapo a keda serka su kokí, un hobensita
frágil i chikí, ku por ta su yu o hasta
su ñetu, pasó sapunan ta krese masha purá.
Tin ta bisa ku kokí ta dominikano, otro ta bisa
ku ta portorikeño, pero esaki a nase akí i ta krioyo.
Tur plaka ku Chapo gana ku kantamentu, e ta gasta
na prenda presioso pa su kokí ku no ta kansa di bisa:
‘Chapo amor mio, abo ta mi dori doríl.’

Dianan a pasa i un anochi Chapo a bai kanta
su so, pasó su kokí tin otro kompromiso manera
último tempu ta pasa mas biaha. Chapo a mira
un hobensita deskonosí manera un prinsesa, bistí tur na prenda,
sintá banda di un sapu gordo i mahos, edat di su tata.
Kuriosidat a pone ku Chapo, na e promé oportunidat,
a averiguá serka e hobensita ta ken e ta i kon e yama.
‘Ami ta Chepita, yu di Chepa i mi ta huntu ku mi pai ku ta bistimi na prenda.’

E anochi ei mes Serapio a kue su bònder di paña
i sin laga ningun notisia el a krusa Saliña
nèt ora e gai di Chepa su bisiña
a kanta pa di tres biaha.


Kompader