Efekto di ofisialisashon di Papiamentu na Aruba

Archivo Nashonal i Fakultat General di Universidat di Antia i ta presentá e lektura:

Efekto di ofisialisashon di Papiamentu na Aruba

Archivo Nashonal ta uni forsa ku Fakultat General di UNA den kuadro di siman di kultura 2005 pa presentá un atardi ku Charla i presentashon interesante dia 25 di sèptèmber próksimo. Archivo nashonal durante henter e siman di kultura lo tin diferente aktividat relashoná ku e tópiko “Papiamentu” i Fakultat General di Universidat di Antia tambe ta duna su koperashon na Siman di Kultura 2005, kontinuando ku su siklo di charla di e aña aki, ku tema sentral “Idioma”.
Durante un atardi kultural ku presentashon di grupo Anaku Kuumba i presentashon di grupo Trinchera, dòkter Joyce Pereira direktamente for di Aruba lo duna un charla interesante den kual e lo elaborá riba: “E efekto di ofisialisashon di Papiamentu na Aruba”.

Dia 21 di mei 2003 gobièrnu di Aruba a ofisialisá Papiamentu. E echo aki ta nifiká tantu un triunfo den e lucha pa rekonosementu di Papiamentu komo idioma nashonal di Aruba, komo un katalisadó fuerte den su proseso pa drenta enseñansa i pa drecha su posishon den komunidat. Dikon tabata asina importante pa ofisialisá Papiamentu, ki efekto e ofisialisashon di Papiamentu aki tin pa otro arianan di komunidat?
Dokter Joyce Pereira aktualmente ta dosente hulandes i papiamentu na e.o. Instituto Pedagógiko Aruba (IPA) i tambe e ta kolaborador di Fakultat General di UNA pa e estudio di Papiamentu di dos grado.

Fecha: 25 sèptèmber 2005
ora: 18:00 or pa 20:30 (anochi)
Lugá: Patio di Archivo Nashonal
Entrada: grátis
Idioma: Papiamentu

Un invitashon na un i tur pa ta presente durante e atardi aki.


Pa mas informashon por yama Eugène Maduro (562-9347) òf Roxanne Toré (519-2242). E-mail: midushilenga@yahoo.com

Saludos,

Gwendoline Isenia, Archivo Nashonal
Tel.: 4614866