Selebrá Siman di Kultura Huntu ku Archivo Nashonal

Fundeshi di kultura ta su dokumentashon históriko. Archivo Nashonal komo konservadó di dokumentonan históriko i promotor di investigashon históriko ta hunga un ròl grandi den estímulo di atenshon i amor pa kultura propio.

Ta mas ku klaro pues ku Archivo Nashonal, no por keda sin partisipá grandemente na siman di kultura 2005. Mas aun pa su ubikashon den Skalo, kual ta un di e barionan di enfoke pa e siman di kultura pa e aña aki.

Nos programa lo ta edukativo i variá i nos ta invitá pueblo di Kòrsou pa bin selebrá siman di Kultura serka Archivo Nashonal.

Eksposishon
Archivo Nashonal su aktividat prinsipal lo ta un eksposishon titulá:

Sin papiamentu nos ta pèrdí.
Balor di nos idioma papiamentu pa nos identidat, nos komunikashon i nos desaroyo.

Meta di e eksposishon aki ta pa stimulá rekonosementu di Papiamentu komo idioma i vehíkulo di komunikashon, identidat i desaroyo; kompartí i traspasá konosementu i informashon tokante e pilá prinsipal aki di nos kultura i stimulá i motivá investigashon di nos herensianan kultural.

Apertura ofisial di esaki lo ta Djarason 21 di sèptèmber 17.30-21.30 or
Komo preprograma lo tin un shap polítiko kargando e mesun título ku e eksposishon. Orador introduktorio lo ta drs. Joceline Clemencia. Lo tin diskushon ku pènel i chèns pa públiko duna nan opinion tokante balor di papiamentu.

Akto ofisial di apertura lo ta den man di minister Richard Gibson di Asuntunan Konstitushonal i Interino. Tambe lo tin poesia di Louis Philip Römer i presentashon di grupo Serenada.

Banda di e eksposishon aki Archivo Nashonal lo tin diferente charla kompañá ku ekspreshonnan kultural.

Porehèmpel: Djadumingu 18 di sèptèmber : 10-15 or
Di 10-12 or Desayuno-merienda Kultural : por kumpra karchi delantá pa e pakete di desayuno na rason di F 10,-. Por kome na Archivo mes o por bai kas kuné! Ambiente ameno ku músika na Papiamentu riba patio!
Pa 13-15 or : Importansha di Dios den nos kultura lo ta e tema. Ku presentashon di banda di gòspel: the Gospelsound i charla: Dios i Papiamentu. Oradornan Richard Hooi i Gloria Bakhuis.

Djaweps 22 di sèptèmber 18.00-20:30 dr. Frank Martinus Arion lo ta orador riba e tema Papiamentu i Investigashon.

Klousura di e siman Djadumingu 25 di sèptèmber 18-20.30 or lo ta na enkargo di grupo Anakú Kuumba ku poesia, dr. Martha Dijkhoff ku e charla: Status di papiamentu i lo sera manera ta digno di nos kultura ku tambú di Grupo Trinchera.

Despues di siman di kultura ainda lo tin oportunidat te ku 16 di novèmber pa mira e eksposishon.

Pa mas informashon tokante di Archivo Nashonal i su aktividatnan, por tuma kontakto ku sekshon di edukashon i informashon sra. G. Isenia-Francisca, telefòn 4614866. Bishitá tambe nos wèpsait: www.nationalarchives.an.