Un kuenta kòrtiku pa mucha (2)

Ismael Kamel, un pata di suek, a blo un dia den Kobá,
sin niun pushi sa di unda el a bin
i lo ménos na unda e ta bai.
Ismael, ta un sekretu e tin:
henter anochi e ta kañá,
ta baila riba kuater pata kachapa
sin bebe un gota ‘i alkohòl.
E ta baila mazurka su so
krusa pia di kater kasi pa trompeká,
brua pata den otro durante un wals,
pa baila wals e tin un pata di mas.
Kayuyu, ñetu di defuntu Shon Keta,
kaweta manera e ta,
(nan di el a tira pa su wela Shon Keta
ku a muri di kuriosidat)
a tende grandinan ta papia
dje sekretu di e kamel Ismael
i a disidí di averiguá
ta kiko ta sintá ei tras.
Despues di fiesta el a sigui Ismael
kuchi kuchi te den Kobá,
el a tende un bos ta papia
ku un lenga un poko pisá:
´Kuidou Shòròmbu, no primi akinan,
no primi mi bulto mashá.’
‘Ta kiko tin den bo bulto, anto?’
Shòròmbu a interogá.
‘Mi ta kontabo un sekreto, ku den Kobá ningun pushi sa,
mi a nase den un sirko i riba un dia
mi a bai hasi ko’i niuskir,
rèk subi na rant di un barí,
slep kai aden, un barí yená ku alkohòl,
fo’i dje dia ei mi a suek mi pata
i mi bulto ta yená ku ròm,
esei ta pasa ora bo ta kaweta,
i buska tur redu pa sa.’

Kompader