Un kuenta kòrtiku pa mucha (1)

Don Yuana, echadó di baina, a kana
lastra tur di banda, dos mushi di ròm den su kana,
raspa ku su pata na porta patras di su kambrada,
nèt ora esaki a sali ku un bònder di paña pa habri na waya.

‘Doña Ana, mi kambrada, mi a sinti bo falta, bin dunami un brasa.’
‘Doña Ana?... Doña Ana?... Doña Ana ta bo kasá na La Kampana.
Ami ta Koma Wana, bo pasá di den Sabana
unda bo ta kana lastra ora bo yena bo kana.’
‘Lo ke sea, yuana ku yuana tur ta yuana. M’a bin
pa regla bo kuenta.’
‘Regla ken su kuenta? Bo ni por para
riba bo kuater pata, te pa bo por regla niun hende su kuenta,
bin yudami kologá paña na waya.’
‘Laga e pañanan para, solo ni a sali. Ban paden pa nos kanta.’
‘Wèl, awe ta abo so lo kanta. Nos delaster kansion a lagami
ku binti kriatura, ku niun bo ke kria.’
‘Koma Wana, Sabana ta kan kan di mata,
bo kriaturanan por kuida nan mes kurpa.
Ademas tur su kara parse bo marí Shon Pa.’
‘Shon Pa ni ta papia te pa e kanta. Mi ke tendebo papia
asina di yunan di Ana, e si ta koba bo madrasa.’
‘Nos ta kanta Aleluya, un refran so, ban.’
‘Lagami lòs, ni un, ni dos refran, kuminsá kana
pa bo yega serka Ana na La Kampana,
promé ku Shon Pa ba warda.’

Don Yuana a keda ku gana i tur di banda el a kana lastra
kue direkshon di La Kampana.
Yegando La Kampana, djaleu el a tende Ana ta kanta Gloria.
‘Hepa’, el a pensa, ‘esaki ta straño, Ana no ta gusta kanta,
tur ora e tin doló di kabes o su kurpa ta kansá, ta kiko lo a pasa?’
Kouteloso el a gatia yega serka di kas i rèk wak na bentana
kurioso pa mira kiko ta pone Ana kanta ku tantu gana.
Ora su wowonan a kustumá ku e skuridat, el a mira Doña Ana
i Shon Pa den koro ta kanta Gloria, tur dos keriendo ku Don Yuana
ta serka Koma Wana ta kanta Aleluya.


Kompader