E GOTA DI AWA I E MEUCHI

Tabata un dia di hopi kalor i nubianan a disidí di
habri nan brasa i laga un labizjan di awa kai riba e
isla. Mei mei di e gotanan di awa tabata tin un ku no
kier a forma parti di e siklo i el a puntra su mes kon e
por skapa di e otro gotanan, ku tabata tuma rumbo di e
laman ku tabata warda nan aya bou.
“No, no” e gota di awa a pensa “mi no ke pèrdè den e
laman grantu ei, mi mester ta liber pa mi por siña
konosé mi mes. Mi mester buska un manera di sali aki
fo”, i ku un salto el a libra su mes for di su
kompañeronan i el a kai riba lomba di un meuchi.
“Hei, gota di awa, ta ki bo ta hasi aki bo so asina?”
e meuchi a puntr’é asombrá.
E gota di awa a kont’é di kon el a bai laga e otronan i
el a puntr’é ku si e por sigui bula ku n’e pa un
temporada.
“Mi ke siña konosé mundu i mira kiko e hendenan ta
hasi. Kisas asina mi por siña konosé mi mes”.
E meuchi di ta bon i huntu nan a sigui nan kaminda.
Nan a bula asina serka di tera ku nan por a mira tur
loke hendenan tabata hasiendo riba e isla.
Despues ku nan a bula pa basta ora e meuchi a puntra
e gota di awa ku si e ta kla pa sigui su kaminda huntu
ku ne.
“No, ainda no”e gota a kontestá. “M’a ripará ku tur
hende ta okupá ku tur sorto di kos sin embargo m’a
ripará tambe ku kasi tur ta sufri di un soledat
inmenso”.
“Si, bo tin rason” e meuchi a duna pa kontesta “i si
bo keda mei mei di nan bo ta bai hasi meskos. Bo tambe
lo buska tur sorto di distraishon i abo tambe lo
sinti e mes un soledat. Ma p’e otro banda lo ta un bon
idea. Si ta bo deseo di siña konosé bo mes , bo tambe
mester pasa den e eksperensha ei. Ora bo bin sinti e
soledat den bo kurason bo mester apartábo for di bo
amigunan i buska silensio den naturalesa. Skuchando
sonido di laman i kanto di paranan. Tambe bo mester
drenta te den bo mes i skucha e latido di bo propio
kurason.
Di e manera ei lo bo kontra bo mes; e dia ei lo bo
haña sa tambe ken mi ta”.
Ku e palabranan ei e meuchi a bula bai.

Den kuminsamentu e gota di awa a buska tur sorto ko’i
hasi, tur kos pa distra’é. E tabata gosa ku smak,
pero un dia el a lanta i el a sinti un kansá i un
soledat inmenso a poderá di dje.
El a sinti un bashí tremendo den su kurason ku a
hasi’é hopi tristu.
Ora kasi e no por a wanta mas, el a kòrda loke e
meuchi a bis’é promé ku el a bula bai.
El a apartá su mes for di tur moveshon i pa largu
tempu el a pasa den kompleto soledat.
Tabata un temporada hopi pisá pa e gota di awa. E no
tabata tende nada mas ku kanto di paranan i sonido di
laman. El a drenta te den su mes i e por a skucha e
latido di su kurason.
Kòrdando e palabranan di e meuchi e no a sukumbí i
poko poko el a sinti kon un trankilidat a kuminsá
drenta su kurason i un alegria inmenso a poderá di
dje.
Kaminda un dia tabata tin intrankilidat, kaminda un
tempu el a sinti soledat, el a kontra su mes, el a
sinti pas.
Porfin el a komprondé tambe ken e ta i ta ki ta e
motibu di su eksistensia : E ta yuda perfekshoná
laman. Sin dje laman lo no ta kompleto.
Ku e konosementu ei e gota di awa a laga su mes kai
den laman i trankilamente el a tuma su posishon mei
mei di e otro gotanan.
El a kontra su mes i tambe e lugá kaminda e ta
pertenesé. E no tin nodi di sigui buska mas. E dia ei
tambe el a komprondé ken e meuchi ta : su propio
alma.
PORFIN EL A YEGA KAS

Diana Márquez