E rais di Kòrsou

mi rais

tur bia mi ta bisa, mi ta hala kita
pero ata mi ‘ki ketu bai pará
kiko ku pasa, mi n’ ta skit niun pia
e pais aki ta di mi e ta

m’a karisia indjan i karga su yuchi
a yega un barku spañó bela hisá
mancha mi rais ku sanger dushi
i inosente di señorita rementá

a hòrta nan tera, tera sagrado
ku dios a regalá pa eternidat
priña nan hembra i kapa nan machu
poderá di nan libertat

m’a yaya katibu i duna freskura
seka sodó di su pechu sunú
keda ketu i gosa di e dulsura
di muzik ‘i zumbi anochi sukú

m’a para skucha kon e ta sklama
ku rabia den mi kurason
pasobra mi no por a hasi nada
ora e ta soportá karbachi di shon

ku orguyo m’a skucha kuchi kuchi
reunion sekreto den anochi lat
di katibunan ku ta yama otro buchi
nan tabata papia di libertat

tempu a kambia i bira moderno
buriku di karga a somentá
a bin outomobil, televishon i stereo
hendenan a lubidá kon disfrutá

mi rais ta trose di tristesa
tur dia ku mi lesa den korant
venenu blanku a bira nos malesa
t’esei a para di nos libertat

tur bia mi ta bisa, mi ta hala kita
pero ata mi ‘ki ketu bai pará
kiko ku pasa, mi n’ ta skit niun pia
akinan mi rais ta ankrá

Kompader