Arte poétiko (un introdukshon)

Dushi, mi ta stimabo,
(kiko nos ta kome ‘we?)
Mi ta pensa riba bo so,
(pòrchòp atrobe?).

Esaki no ta poesia,
señor Jules a siña nos.
Esaki ta papiá di tur dia,
nos tin ku pensa otro kos.

Mi amor, abo ta motibu di mi eksistensha,
kiko e mundu ‘ki ta nifiká sin bo?
Mi ta sinti e kalor di bo presensia,
manera un piská den zeta kayente hasando.

Esaki tin por lo ménos tres elemento,
pa un komienso e ta basta bon.
Ban purba hasié mas perfekto,
pa demonstrá nos bon intenshon.

Mi kurason ta spièrta yen di ‘legria,
e aliento di bo sonrisa mainta tempran
ta e testigu palpabel di bo presensia,
(bo tin ku usa ménos konofló mayan).

Bon, nos ta keda te akinan por lo pronto,
en espera di un kontinuashon
di e instrukshon tan valioso
di kual nos a haña djis un introdukshon.

Kompader