Referèndu

Shonnan, un be ‘ki tin referèndu,
ta un sorto di elekshon.
Pero sin partido polítiko,
ta riba ken ta vota anto?

T’ asina Katan a tende riba kaya,
e n’ ta kòrda ta ken a kont’é.
Segun e ta su komader Shon Iya,
pero e demoño ei, e no ta konfi’é.

Katan a bai skol di sùr na Punda,
ke men ku no ta hende kèns e ta.
El a siña lesa, skirbi i tambe konta
pues splik’é ta de ke se trata.

Ta un asuntu ku pueblo tin ku disidí
riba futuro di nos pais Kòrsou.
Anto, ta pakiko tin un gobièrnu den fòrti,
nan no ta hasiendo nan trabou?

Promé tin un kestion di independensia
kier men nos ta bai para riba nos mes.
Awó ta serka ken lo buska asistensia
ora kosnan kuminsá bai robes.

Ta papia di bira un provinsia
pa makambanan bin manda riba nos.
Dios mester libra, ta hendenan yen di astusia,
ku ta puya stinki anto pa nan plaka ta tur kos.

Ta kiko ta status aparte den reino
esei si e no ta komprend’é.
Esaki parse wega di gitano,
bo t’ afó anto ora kumbiní bo ta den.

Bo por opta pa no kambia nada,
ta nada mas ku kompa tira leu.
Otro islanan a kue nan mes kaminda,
pa nos tur laga ... (pone nos kabes na pareu)

Shonnan, bisami ki mi tin ku hasi,
kua opshon mi tin ku skohe p’e.
Awèl, ta un kos so a kedami,
ta di bai resa na San Miguel.

Kompader