Poesia na papiamentu

Awe mainta (djadumingu 23 di yanüari 2005) e Fakultat General di Universidat di Antia a organisá un charla hopi interesante tokante e tópiko “Poesia na papiamentu”. E orador tabata e konosido eskritor Jules Marchena.

Señor Marchena a trata sinku elemento prinsipal ku un poeta tin na su disposishon ora e ta skirbi un poema: metáfora, komparashon, personifikashon, eksaherashon i pregunta retóriko.

Aki nos ta trata “komparashon” manera señor Marchena a splika awe mainta.
Den un “komparashon” e poeta ta kompará dos entidat ku otro, hasiendo uso di e palabranan “manera” òf “meskos ku”. Pero no por kompará dos konsepto ku otro sin mas; e dos elementonan ei mester tin algu komun. Den un òf mas aspekto nan mester parse otro.

Ehèmpelnan:

Manera un fiesta ku a kaba mardugá
Kansá l’e pone su kabes abou
Bisando: “mi si n’ por bandonábo mi Kòrsou.”
(Ornelio ‘Kees’ Martina, Yu di Kòrsou, for di: Alivio)

(e pos) foi kwa nos dos lo subi komo para
ku, sin esfwerso, ta blo drif meskós
ku bjentu líbr i zonido ‘i bos
bai baha den un palu ‘i karawara.
(Luis Daal, Sunú, for di: Sinfonia di Speransa)

Mainta a kai for di den brasa di pesadia
sin poesia pa sende e kandela
ku pagando, a laga su rekuerdonan
manera karbon uzá
(Jopi Hart, Despedida, for di: Entrega)

Algun ehèmpel di “komparashon” den bida diario:

Marita su bistí demasiado largu a ked’é meskos ku
mucha ku ta bai kumindá Pepe.

Johanita a bira flaku, ral, manera pekelé ku sous a skore laga.

Bo a mira Winchi flaku largu ei ku su hèlmu bistí,
e ta puru bo ta mira un klab’i zink.

Ku tur e kantidat di krema ku e ta pone pa bringa behes, tòg su kara ta
presis bo ta mira un preimu chines.

E dams ku a bin biba banda di nos kas ta kana manera hende ku a guli harspèl.

E tèrsio ei ta bobo sin fin, su sintí ta meskos ku di pal’i maishi.

Anita a spanta ora el a tende e notisia, keda meskos ku biná ku a tende tiru.


Jules Marchena

E publiko ta skucha ku hopi atenshon