Nos preokupashon

Miéntras

Ku na Seru di Miseria
un mama ta lubidá su yuchi
ni un pida buskuchi
e pober no a kome ‘we
e ta sera su wowonan solitario
i saka su último suspiro
pa wak ku serka Papa Dios si
tin maske ta un tiki
kariño p’e.

Miéntras

Ku na Seru Kokaina
un hóben drogadikto
ta sklama pa ousilio
un kuchú pegá den su alma
na kaminda pa yudansa
un yuchi a bin kana su banda
bis’é ban ku mi, no spanta
mi sa na unda
tin felisidat.

Miéntras

Ku na Seru di Sosiegu
un pachi den su stul di zoya
ta gosa di streanan manera hoya
ora sin invitá e ta haña bishita
di dos hobensitu ku arma ’i kandela
ku pasó e no tin nada di duna
promé ku su dia a yega
ta mand’é unda e yuchi
tambe ta.

Miéntras

Tantu na mes un momentu
i durante di mes un anochi
(i tambe tur otro anochi)
na tur parti di nos Isla
preokupashon profundo ta reina
diskushon flamante ta surgi
tin bia te su manisé
si nos Karnaval
lo engrandesé.

Kompader