Nieuwe mensensoort ontdekt op eiland Flores

Buchi

Ata Buchi!... Ta ken a puntra mi p’e ayera,
ta ku ken mi tabata para papia,
un ta bieu si mi ta birando
pasó mi’n ta kòrda mas.

Ta basta tempu nan a pèrdele,
ta basta dia nan ta buskele,
ta fo’i dia el a bai keiru ku barku
ku grupo di Jolly Tours.

El a bai ku un par di amigu
pa nan konosé teranan lehano,
paisnan otro banda di mundu
pa wak si nan ta topa nan primunan.

Ora barku a yega Indonesia,
un pais di 17.508 isla
di kual 6000 tin habitante,
Buchi a haña gana di bai landa su so.

Buchi ku ta un hòmber di awa,
ki ora ku e haña un chèns e ta landa,
a kita tur su pañanan pone un banda
i bula na awa blo sunú.

Ta delaster bia ku nan a mira Buchi,
pasó su amigunan a bai un warung
bai kome nan babi pangan,
pa nan top’é bordo barku despues.

Anochi a sera, nada di Buchi,
nan a warda i warda te kansa,
nan a bai wak kaminda el a bai landa
topa su bònder di paña ketu bai ei nan.

Nan a yama i yama nòmber di Buchi,
eko di nan stèm a duna kontesta
ku Buchi manera semper e ta hasi
a kue su kaminda bai laga nan.

E barku mester a sali,
e amigunan a keda tristu,
den nan kurason nan ta tin e siguransa
ku un dia e lo regresá.

Awèl, awe ta dia di fiesta,
pasó un Oustraliano a topa ku Buchi,
lagami bai konta su amigunan
pa nos tresele su kas bèk.

Kompader