Bon siman

Djaluna mainta,
kargá ku energia
trabounan riba mesa
sperando riba nan dia,
pero un bon kòfi promé.

Pipa’i awa a kibra ei fo.

Djaluna mainta,
wèl... legumai e kòfi numa
venenu pa bo ader
ban wak si e bunitesa
a kumpli ku su promesa
di djabièrnè atardi lat.

Error 680: mail server could not be found.

Djaluna mainta,
shit... kuminsá traha numa
repasá tur sita i
kosnan ku a keda para
despues di tantu dia liber
ku niun hende a pidi p’e.

Maida ta malu awe.

Djaluna mainta,
atrobe... ban hasi yamada urgente
yama direktamente
numbernan sekretu
semper alkansabel
riba selular.

E number ku bo a yama no ta den servisio aktualmente

Djaluna mainta,
oké... ban koketiá k'e beyesa rubiano
riba segundo piso
ku su sonrisa radiante
kabei pretu lombrante
figura di atleta olímpiko.

Lisa ta ku fakansi e siman aki

Djaluna mainta
kargá ku energia
sin sa kon deskarg’é
awe no ta mi dia
bo sa kiko...
mi ta tuma un sneperdag.

Mener tin dos flèt tayer

Djaluna mainta...

Bon siman

Kompader