Palabranan

Palabranan pensá
ta sekretu
skondí pa otro
bo so sa:
mira un shon ei
esta bon no
mi tin gana di...
primié.

Palabranan papiá
ta pasahero
bula bai bolbe
tur korkobá:
mi no a bisa
mi stimabo
mi a bisa...
ai legumai.

Palabranan kantá
ta persistente
ripití i ripití
mesun kansion:
zullen we maar weer
zullen we maar weer
zullen we maar weer...
paga e radio ei.

Palabranan skirbí
ta permanente
pretu riba blanku
no tin duda:
kada pakiko tin su pasobra
kada para konosé su pluma
kada loko ku su teima...
asina ta.

Palabranan lubidá
ta trastorno
skonde i tenta
lo ta edat:
komo se yama...
e ta na mi punta ’i lenga...
e baina ei no...
si e mes.

Kompader