Asina Muhé Ta Manda Mundu!

E Sekretario di Estado nobo a bin di bishita, ma nó di trabou
E di ku el a bin pa topa, pa wak ken ta ken, pa konosé Kòrsou
Wèl, señora Ank Bijleveld a yega, a topa, a studiá i a opiná
Anto pa proba ku ta muhé ta manda mundu, el a lusi i impreshoná
No ku palabra, ma ku echo, el a laga e “kontranan” tur tolondrá

Komo señal ku e ta kla pa koperá a bai 7 mion pa Reda Sosial
Habri paso pa Shon Layo i Sr. George por sigui traha sin basilá
Riba renovashon sosial i alivio dje deterioro lamentabel i fatal
Pa institushon no-gubernamental el a lòs algun mion pa nan trabou
Asin’ ei señora Bijleveld a “steal the show” laga NAN boka kayou

Unabes akinan e mandatario a subi bus drenta bario p’e mes opservá
Den Santjago, Montebèrdè, Kòrnèt, Koralspègt, Roisantu, bai terminá
Den bario di Santamaria, skucha, kòmbersá aki aya, tende splikashon
Komentá: “mester traha pa drecha bida, ban sòru pa mihó kondishon
Ku ta pa mi kos por kana awe mes, mi ke ehekutá e PALABRASHON”

Siguiente dia sin miedu señora Balente a baha drenta kueba di leon
Pa den BC e topa e machunan ku a vota “kontra” e PALABRASHON
Ni kon leon a rugi pa spant’é, trankil señora a bari tur ponensia kita ‘fo
Anto bisa: 20 di aprel votadó mes ta na palabra, nos lo warda i meditá
E muhé ta stroi ku plaka, mete ku nos asuntu, furioso leonnan a sulfurá

Den tres dia señora Balente, mandatario fo’i Hulanda, a demostrá
Ku ta muhé mes ta manda mundu, tresiendo yudansa i plaka pa ataká
Pobresa i deterioro ku ta stroba nos desaroyo i tin Kòrsou paralisá
Loke Hulanda ke mira ta seriedat di polítikonan i di nos tur aki bibá
P’esei, sin un alternativa, ban ehekutá e PALABRASHON, anto purá!

Henk Rhuggenaath
Troepiaalweg 15