Ton Raton (un kuenta di gañagaña)

Ton Raton, ladron di wiriwiri,
a bai será mi n’ sa kuantu bia
kada be ku e sali e ta kometé
mesun bagamunderia.

Tur kos riba su kaminda e ta hòrta
miel di abeha, suku di vruminga
webu di bubi mas grandi kuné
hasta pan den pastorí di Shon Pastor.

Riba fèlt palomba a pèrdè su renchi
el a keda tur ariba abou
su amigunan a buska te anochi
Ton ku un kara seku a yuda nan.

Sòldá di Rei no sa kiko hasi:
Ton, atrobe bo ta aki den
bo n’ por drecha bo bida, buska ko’i hasi
unda mi yabi ta, ken a kue mi yabi?

Ton tabata di bishita serka Maribomba
nan a sinta kòmbersá te atardi lat
ora el a bai, Maribomba a bai bebe un poko awa:
Karamba muchanan, boso a laga e eiskast blo bashí.

Ton a sali for di kurá di Baka
ku un saku asina grandi ta lastra su tras
Toro a puntra: Ton, kiko bo tin den e saku ei?
Bo madrasa, Ton a kontestá.

Un dia Ton a disidí di drecha su bida
el a bai traha na molina di Shon Rei
unda ta mula tur sorto di maishi
tur atardi un saku di hariña ta kria pia.

Esun ku ta kue saku di hariña
ta pèrdè su kuater patanan
i su rabu largu, Shon Rei a partisipá
siguiente dia Ton no a bin traha mas.

Asina Ton a haña mal fama
tur kaminda ku e pasa nan ta skonde p’e:
Ata Ton ta bini, shonnan wak boso kosnan.

No a sobra nada pa hòrta
kon mi ta hasi biba? Ton a pensa
el a buska trabou i e no por haña
ni den prison sòldánan no ker’é.

Morto di hamber Ton ta kana dualu den kunuku
su nanishi a sinti un holó mashá dushi mes
ku ta bin for di direkshon di kurá di Baka
pone su barika gruña un tiki mas.

Ton a rèk wak den kurá di Baka
el a mira un keshi blanku delisioso
ku Koma Baka a kaba di traha
pa su yu muhé Bisé.

Ton a warda Toro sali bai Sabana
el a slùip drenta den kurá di Baka:
Koma Baka, psst, Koma Baka, bin tende.

Ta ken ta yamami?

Ta ami, Ton, mi ker a puntrabo algu.

Ahan, t’abo, Ton Raton, akinan no tin nada di hòrta.

Nò, nò, Koma Baka, mi a drecha mi bida, mi no ta ladron mas
tende, mi tin un proposishon faborabel pa nos tur dos.

Bo ta hasimi mashá niuskir.

Tende, Koma Baka, tur atardi ora Toro bai Sabana
mi ta pasa pronkabo un tiki, anto bo ta dunami un pida keshi.

Ton, bai sinta un banda, kiko bo tin pa pronkami kuné?

Wak bo ta mira, si bo no purba, bo no por sa.

Oké, ta bon, laga nos wak kon e kos ei ta bai.

Ton, bon kontentu, a bai para tras di Komo Baka
wak na laira pensando kon e ta hasi yega.

Koma Baka ta warda i warda, el a pèrdè pasenshi
i pa yuda Ton, Koma Baka a disidí di kai sinta.

Kompader