Luna Kalakuna (un kuenta di gañagaña)

Nan di ku Luna Kalakuna
su mama a brui e den mondi
i ku ta p’esei Lunita
no sa para den kurá.

Lunita tin sinku kriatura
ku e ni sa drai mira
ta Koma Gans su aktuprima
ta tira un bista riba nan.

Koma Gans ta baña nan mainta
duna nan kuminda
strika nan pluma
manda nan kunuku
pa nan bai buska nan mama.

Nan ta topa ku Lunita
den kunuku di Bringamosa
manera semper be su awa
ta hunga plaka ku Morkoi.

Koma Gans, ku di un distansha
ta sigui e kriaturanan
ta kunsumí di su alma
i ta kue Lunita aden.

Luna bo ta un sinbèrgwensa
bo ta un mama kalakuna
bo no tin kunes ku bo yunan
kue bo potoshinan pa bo ban kurá.

Morkoi, ku no ta gusta problema
ta hala kita un pia un pia
kinipí wowo ku Lunita
manera e ke bisa, te mañan.

Lunita ta dal un gritu hari
lanta para medio burachi
bisa Gans su aktuprima
Primita, bo ta un bon famia, bo sa.

Sin bo ta kon lo mi a hasi
ku sinku kriatura tra’i mi rabu
ku mi a brui, pero bo no ta puntra
ta unda nan tata ta?

Bo ta yamami mama kalakuna
pero mi no a pidi pa dèk mi
mi no a deseá di pone webu
ken a responsabilisá?

Mi no ke pasa henter mi bida
den kurá ta pik maishi
kore tras di kakalaka
tres bia pa dia ser di dèk.

Mi no ke pa mi yunan
sigui mi mal ehèmpel
p’esei mi ta pidibo prima
tira bon bista riba nan.

Su wowonan a yena ku awa
el a brasa Gans su prima
karisiá e kriaturanan
para règt riba su patanan
drai buska Morkoi.

Morkoi... Morkoi... Sinbèrgwensa, bo no a pagami!

Kompader