Palabrashon

Bòchi Blòblò, ta bòltu tur elekshon
el a lastra na porta di tur partido
awor e ta ku Wa Warawara
di Partido Kunuku Uní.

Wa a primintié ku ora nan gana
Bòchi ta haña e kartera di Bagamunderia

Ya Bòchi a drumi soña
kon e ta pone fulan riba kaya
kon e ta duna tal un puesto
kon e ta tuma sèn bou di mesa
i kon e ta falsifiká dokumentu.

Lokual Wa no sa, ta ku den sekreto
Bòchi a palabrá ku Shon Ki Kinikini
ku ora e drenta parlamentu
e ta bòltu di partido
bai ku su asiento
serka Shon Ki su Moveshon.

Asina Bòchi a sigurá ku kon ku para
e ta haña su puesto di minister
i porfin despues di hopi lucha
e ta bira importante den komunidat.

El a kore un kampaña ku maña
kore bario di mainta te anochi
stroi maishi pa galiña
basha ròm blanku pa yuana
primintí kas nobo na sòldachi
traha nèshi pa vruminga.

Wa a sali viktorioso
danki na esfuerso di Bòchi
despues di hopi sansaña
a forma un koalishon ku Shon Ki.

Bòchi a bin reklamá su puesto
di Minister Bagamundu
e dos lidernan a keda wak otro
niun no ta kòrda ningun palabrashon.

Kompader