KAMALEON

Kana hari, hunga nèchi.
Duna man i primintí.

Kòrta sinta, pone sonrisa.
Mira kámara, saka djente.

Pasa aki i pasa aya,
purba komplasé tur hende,
pero yega kaminda tin doló i tristesa,
lubidá!!

Ora di selebrashon bo t’ei manera bolo,
mashá sosial i komplasiente,
pa despues kòrta i masakrá.

Purba adaptá na tur sirkunstansia
manera KAMALEON.
Hunga ròl mihó ku aktor òf aktris.
Un kayente un friu, morde supla.

Ta ken mi ta? Ta kiko mi ta?
Sin karakter, sin prinsipio,
mi ta sigui ta un KAMALEON!

Reginald V. Römer
1/06/2005