UN DI DOS CHÈNS

Apesar di un di dos chèns, pa puro grasia di Dios
Diputado Pierre ta aktuando sumamente mahos
Dikon Nelson ta stima publisidat djis pa hasi kos fo’i sla?
Esnan ku el a impreshoná mi ke bisa: buska pa bo sa

Un ten mas spiritual, awor a proklamá di ta sosialista
Esun ku ta bai ranka duna pueblo... plaka di kapitalista
E kos di Pierre ta zona mané historia di Robin Hood
Ku tabata atraká ken ku pasa den mondi band’i Sherwood

Atrako, mi kerido Pierre, no ta un bon fórmula pa goberná
Pasobra awendia un atrakadó por konta ku e ta kai será
Gobernante no tin derechi di ranka nada, ni pa e kompensá
P’esei nos ta paga hopi impuesto, tur ku entrada tá aportá

E “audit” operashonal pa niun hende no ta nada straño
Te pa bira motibu di pleitu, kousa asina tantu daño
Mané e yu pèrdí ku su di dos chèns, Nelson mester realisá
Ku niun hende no meresé di keda violentamente humiliá

Ta bon pa spesialista listra Aqualectra su estado di salú
Ma no tin hustifikashon pa kue un gerensia kita blo sunú
Si no ta sufisiente, Pierre ke laga direktiva man i pia mará
Lubidá ku ta pashènt í dòkter ta disidí kiko i kon investigá

Si chèk Pierre su aktuashon, komo sosialista i komo hende
Ta bon puntra kiko e ta aportando pa adikshon no sigui rende
Ku ni análisis dje supuesto sanger venená nos nó a haña tende
Nelson, uza bo di dos chèns; duna lus di Señor lugá pa sende!

Karta rítmiko di:
Henk Rhuggenaath
Troepiaalweg 15