mi rais

tur bia mi ta bisa, mi ta hala kita
pero atá mi aki ketu bai pará
kiko ku pasa, mi no ta skit un pia
e pais akí ta di mi e ta

m’a karisia indjan i karga su yuchi
a yega un barku spañó bela hisá
mancha mi rais ku sanger dushi
inosente di señorita rementá

a hòrta su tera, tera sagrado
ku dios a regal’é pa eternidat
priña su mosa i kapa su machu
poderá di su libertat

m’a yaya katibu i duna freskura
seka sodó di su pechu sunú
keda ketu gosa dje dulsura
di muzik ‘i zumbi anochi sukú

m’a para skucha kon e ta’ sklama
ku rabia den mi kurason
pasobra mi no por a hasi nada
ora e tabata soportá karbachi di shon

ku orguyo m’a skucha kuchikuchi
reunion sekreto den anochi lat
di katibu ku ta yama otro buchi
nan tabata guièrta pa nan libertat

tempu a kambia i bira moderno
buriku di karga a somentá
a bin outomobil, televishon i stereo
hendenan a lubidá kon disfrutá

mi rais ta trose di tristesa
kada dia ku mi mira nos bèrdat
kudishi a bira un malesa
ta esei a para di nos libertat

tur bia mi ta bisa, mi ta hala kita
pero atá mi aki ketu bai pará
kiko ku pasa, mi no ta skit un pia
akinan mi rais ta ankrá

Kompader