17 ougùstùs: Dia di Tula

Drecha famia

Kachi Michi, sali for di solo
bo koló no ta bastante skur?
ma mi yu ta kende bo a sali
e nanishi ei no ta di mi si

Kachi Michi, lubidá e fiesta
na e kas ei si bo no por bai
yen di mucha mas mahoso ku bo
mayornan ku ta yora malai

Kachi Michi, drecha e kabei ei
mucha kla formá bo ta awor
wak un frei ku un poko moda
pa dunabo kosnan di balor

Kachi Michi, rumbo pa Hulanda
pa bai studia leu den eksterior
kontentu ku porfin e por move
na Hulanda nan di tur kos por

Kachi Michi, poko tempu a pasa
a disidí di no studia mas
i awor e yama Kaatje Miesje
kore kaya lubidá bai kas

Kachi Michi, riba un paranda
a bin dal den Jan van Alleman
wowo blou kabei blònt ku bon tipo
echadó di baina den Jordaan

Kachi Michi a anunsiá tur hende
no ta nada mi amor lo kambi’é
e ta hasi tur lokual Jan bisa
hasta e sa tira buèlta p’e

Kachi Michi a sali na estado
su barika ta bunita i rondó
porfin el a realisá su soño
ya e yu tin yen atmiradó

Kachi Michi, ya ta shete luna
kasi loko di desesperashon
Jan di e no ta kria yu di kaya
otro hende tin su atenshon

Kachi Michi no sa kiko hasi
e ta sin pariba sin pabou
el a fia sèn kumpra un pasashi
drenta avion bini bèk Kòrsou

Kachi Michi, aki bo n’ ta drenta
ku barika sin bo ta kasá
kiko e bisiñanan lo pensa
bo ta meskos ku un hende pasá

Kachi Michi ta lastra riba kaya
topa ku un konosí bieu di dje
Lagadishi ku a kai den droga
kla pará mesora pa yud’é

Kachi Michi ta trose di doló
Lagadishi a duna un man e mes
at’e yu a nase sano i salvo
wowo blou kabei las nanishi stret

Kachi Michi loko di legria
no por warda pa bai bèk su kas
ku su pòpchi ku lo drecha famia
no ta zundra Kachi Michi mas

Kompader