KLIKO KUNÉ

Tal bes nunka bo no a ninga ni a kuestioná su kapasidat
Ma komo polítiko, siudadano, hende, e ta un insulto di bèrdat
Pa imponé su kier nunka e no tabatin lei ku e sistema ko-laboral
M’a preferá di arma trampa, inventá mil i un chake sensashonal

Semper di su bida el a para riba i eksihí pa kos bai manera é ke
P’esei nunka e no a aploudí ni apoyá loke otronan a bin kuné
Asin’ei pariba di brùg añanan largu el a dominá mundu sindikal
Ku táktikanan pa impreshoná i blèndu demas sindikato fraternal

Hesus, Toro mayó i su toritonan a lucha pa eksigensia salarial
Ku táktika di buta preshon, akshon i wèlga, kopiá internashonal
Buki kòrá di Mau Tse Tung den man toritonan tabata hopi disidí
Hiba kampaña, krea desórden, fòrsa bara, buta gobièrnu sukumbí

Toritonan a bin ku e idea di reuní miembresia bò’i ora di trabou
Kousando pániko i bruamentu formal den skolnan rònt Kòrsou
Ku kantika pa mama gai, demostrashon masal den sentro di siudat,
Fo’i Kurá Piedra a hasi deshasí, sin konsiderashon pa komunidat

Ros ros Toro a keiru drenta Fòrti, “un lider” tabata su lema
Lugá, el a probechá, bia rònt mundu, bula pipa pa tur problema
Loke si el a promové ta mafiamentu den “Mundu di ekonomia”
Fábrikanan den kiebro, ta proyekto fantasma só el a pone riba pia

Siman pasá, Toro, riba man, a konvoká reunion general den sede
Miembresia laboral, fadá i desgustá, a duna Toro e señal di dede
Ban reuní riba brùg, el a sklama, elekshon 2007 ta nos dilanti
Tin notisia, hopi plaka pa kampaña, m’a regl’é den mi fakansi

Pa tapa ku m’a traishoná outonomia, mi ta gaña di ta e mensahero
Ku a sòru pa Venezuela i Kòrsou sera un pakto nobo i duradero
Tur hende lo kai p’e preteksto ku m’a bai Caracas pa trese apertura
Pa kura neurosis di un diputado, ku ta serka di drenta trans di lokura

Ta ora pa hisa Toro i su krusada benta den kònteiner di Klikitu
Esei ta loke Mau Tse Tung ta konsehá den kapítulo 7 di su libritu
Segun Mau t’asina: ora e ataká i nos elimin’é el a haña loke e bal
Si nos no elimin’é kompleto e no ta siña su lès pa kur’é di su mal
Ma si nos hisa Toro benta ‘fo kompleto, a siñ’é un lès hopi bestial.

Henk Rhuggenaath
Troepiaalweg 15