Si no yobe lo pinga (E soño di Katan)

Teksto: Roy Evers
Diseño gráfiko i potrèt: Ariadne Faries
Imprenta: Van Haaren Printers
ISBN: 99904-0-675-8
Kòrsou, 2006

E buki ta na benta dia 29 aprel (Aña di Lareina) na Vrijmarkt, Marshe di Pruga, den Punda. Bishitá e tènt di Kompader den Hanchi di Snoa en frente di Sinagoga. Por reservá buki tambe via di e adrès: revers@cura.net


1. Katan i Shon Iya

Shimis di seda
tur na puiru
peluka riba su kabes
Katan a pasa, bela haltu
sin mira Iya su komader
ku ken e n’ ta parti un pan.

Ma Katan
ta ki mi a hasi bo
ta kon tin tantu purá
ta lamuèrtè ta bo tras?

Atá, Shon Iya
mi no a mira bo
ta mané bo a bira
mas guepi ku bo tabata.

Bai na moula, mala yerba
guepi mes mané mi ta
tur anochi mi ta haña
un bon zoyá
unda ta bai tantu anshá?

Wèl Iya, bo mes sa
awe ta dia di paga ònderstant
mané gobièrnu ta awendia
ta mihó bo bai kobra tempran.

Ta kua ònderstant
ta kobra awor
no ta traha mas den kushina
serka e chinu na Brievengat?

Ta fo’i bo snùit
unda mi ta traha o lag’i traha
ta Chichi mi yu muhé
ku ta traha na gobièrnu
a regla e asuntu ei.

Un miserabel shen florin?

Wèl e ta yuda paga
maske ta hür di kas
huntu ku e dòsplaka
ku Chichi ta duna mi
e ta sera un bon boká.

Si sobra algu
despues di kasino
unda mi ta mira bo
tur siman.

Esei ta mi asuntu
ta pa mi wak si e sèn
por rende un tiki mas.

Pero Shon Iya mi ta sigui
pa mi no yega muchu lat
pasa plasa dal un guiambo
pa e chanchan ei bola
un tiki mas.

Den bo kriki, mala lenga
bai ku satanas.