MUHÉ

Muhé,
mas ku tur kos
i semper
bo a intrigámi

Bo amor di mama
e pasenshi pa eduká i kuida
kargá pa e kurashi pa kastigá
siendo bo kurason ta sangra

Bo pashon misterioso
dòrná pa bo karisianan tierno
interumpí algun bes pa bo reakshonnan fastioso
balansá pa bo dulsura adiktivo

Bo por spièrta e mucha den mi
dominá e bestia den mi
sin laga mi repentí
di mi soñonan tribí

Nunka mi no por lubidá bo
tampoko papia malu di bo
sigur no perhudiká bo
pasombra t’abo ta mi premio mayó

08.03.2006
Hensley Koeiman
h.koeiman@una.an
568-8709