Krusa Laman

Festival Literario Internashonal
Djasabra 23 di aprel 2005
Kòrsou


Jopi Hart

FANTASIA

Ata!
M’a plama tur mi paden bo dilanti.
Skohe e prendanan
pa dòrna bo kurpa
den spil di mi pensamentu.
Hari ku djent’i perla awor.

No bai!
Lagami bistibo un koyar
di laman kòrá
pa kuadra k’e dos gotanan di shelu
ku mi ta kologá na bo orea.

Asina!
Kana prònk.
Bira rònt.
Wak di banda.
Traha kara
te ponemi hari.

Ata!
Tuma armbant di dulsura
- bo marka di mi fantasia -
i hala den mi spil
pone bo kara na mi frenta.

Ora bo bai,
ora bient’i mainta pasa kuashi
kita tur telaraña for di mi soño,
lo mi sinti friu kòrta
te den fondo di mi alma.


LAMAN

Ora laman lanta kabes
balia bòltu bringa,
dal den baranka,
spat den skuma salgá sangrá …
den su furia mi ke ta.

Ora laman hal’atras
lastra bibu ku morto bai kuné
den profundidat muhá di su reino …
su forsa destruktivo mi ke tin.

Ora laman sapatiá bini bèk,
sulfurá suta spat salu,
te pinta shelu di Norkan
k’un dezòrdu di koló …
parti di dje mi ke ta.

Ora laman kore keiru kant’i kosta,
karisiá ku dede floho
bahianan hanchu i ketu,
hunga ku plaser sensual
rondó di barankanan lombrá …
un kuné mi ke ta.

Mi ke su furia salbahe.
Mi ke tin su poder kreativo.
Mi ke fia su karisia sensual.
Mi ke biba na punta
di mi kuèrdènan,
krea melodia inkomparabel,
eterno.
Meskos ku laman.


Entrega
Jopi Hart
Willemstad, Curaçao N.A.
2000