Elekshon

Katán ta kere fiel
den un gobièrnu di koalishon,
ta p’esei nunka en vota
riba un partido so.

E ta basha su bala
riba tres lista pareu,
pa un solo partido
no haña tur poder.

Awor ku a bin kòmpiuter
ku ta un kònòpi so ta traha,
votamentu a pasa pa olvido
pa siudadano Doña Katán.

Chichi a purba splika
ku t’esei ta demokrasia,
Katán na su turno a splika
ku demokrasia ta Partido Democraat

Un partido ku a pèrdè
tur su konfiansa
fo’i dia ku nan
a ninga Fein.

Ata e partido bèrdè
esei en ta mòrs ku n’e,
ta partido di su komader
un dèmful di marka mayor.

Anto tin e partido oraño
ku ta blo pretendé
ku ta pueblo ta salba pueblo,
un pueblo sanka na man.

E asuntu di man limpi
ántes por tabata bèrdat,
mira den kuantu kos
nan a hinka nan man.

E koló hel di solo
esei e ni konosé
nan di ta un monton di sabínan
ku’n tin interes den Shon Katán.

Tin un mas,
koló di flamingu,
mener di skolnan ku ta kana borotá,
miéntras ku enseñansa ta riba su atras.

“Awor splika mi
Chichi, mi yu,
ta ken a sobra pa yuda
bo pober mama Katán.”

Kompader