Bon gai

Mi te hunga un ròl di morto
Pa mi tende kuantu bon
Mundu a ke mi sin mi sa

Pasombra ya ma mira kaba
Miéntras tantu bo ta bibu
Bo no sa ki bon bo ta

Ma ‘ sina ku bo laga tumba
Bokanan dushi ta mèlmè
Ki bon gai bo tabata

Ai, tur Hende ta gababo
Ast’esnan ku no konosé bo
Maske ta pa flou esküs

Si bo orea por a tende
Lo bo sabi kuantu hende
Bo spiritu a bishitá

Si bo drumi gaña morto
Bo ta sa e diferensia
Den e duele-muchu-nan

Tin ta bini ku siboyo
Pa nan frega bou ‘i nan wowo
Pa blòf ku e lensu perfumá

Ma ta un wowo so ta yora
E otro mester keda spièrtu
Pa haña kos di komentá

Ata si bo mester a laga
Un shushi den bo tèstamènt
Lo bo drif den lágrima

Esun ku semper a marka
Krus dòbel tra’i bo lomba
Ta hunga ròl di desmayá

I esnan ku te ainda debebu
Ta para mira yen di miedu
Pa bo no resusitá

Tin ta yora di alegria
Ku porfin a yega e dia
Ku e diabel a eksplotá

Otro ta para kla pa pui bo
Ku e feneta; úniko chèns
Pa nan tuma rivènch

Ora tin ku sera kaha
Hopi ta gruña den djente
Skruf e bon pa e no sali mas

Mi te hunga un ròl di morto
Pa mi tende kuantu bon
Mundu a ke mi sin mi sa

Lo mi paga e kobadó bon
Pa mi sa ta ken a benta
E baranka di mas pisá

Úniko kos ku mi ta kòrda
Ta e bendita labadó
Ma lo mi palabrá kuné
Pa e balsemá mi kara so

(Flor di Anglo 1961. Elis Juliana)