Un kuenta kòrtiku pa mucha (4)

Yubi Chuchubi, lenga ‘i tolèlè, a kana konta
ku Don Gayo Lindo den dia ta kanta
kokoyoko, anto anochi e ta zoya
merengue ku Patricia Patu i ta pa
esei galiña no a sobra orea.
Abrenusia,
netamente ku Patricia Patu, ku ta drenta
ku ken k’ e topa i no ta kòrda
ku ken tur el a baila bachata;
no ta pòrnada e ta karga
su nòmber robes pa drechi.
Doña Poyo, un galiña di bon famia,
ku no ta permití ningun para papia
malu di su kasá, a kunsumí mashá
i no a tarda pa informá
Don Gayo Lindo, su kasá,
kiko Yubi Chuchubi a laga sa.
Don Gayo Lindo, un gai kòrá
potente, su plumanan nèchi striká,
un reputashon indiskutibel,
di antesedente aristokrat,
ku un bos severo ku a resoná
te pariba di kurá,
(pa kasualidat Yubi Chuchubi ta sintá
den un palu pariba di kurá)
a kontestá:
‘Mi ta pon’é paga pa su piká,
yama Shon Ki Kinikini pa mi palabrá
kon ta duna e maldito chuchubi un bon sutá’.
Shon Ki a presentá i Don Gayo Lindo a palabrá:
‘Shon Ki, awe nochi bo ta bai
den mondi di kadushi huntu ku mi kasá
Doña Poyo, boso tur dos disfrasá,
bai buska e maldito chuchubi ku ta
daña mi reputashon i bo ta dun’é un bon sutá.
Bo ta puntra e promé para ku bo topa
bou di palu di indju pabou di kurá
unda e demoño su nèshi ta.
Ora bo ta bèk bo ta haña
dos puitu pichon komo rekompensa.’
Dicho hecho,
anochi Shon Ki i Doña Poyo, disfrasá
a topa un para deskonosí bou di palu di indju sintá
i nan a puntra unda e nèshi di Yubi Chuchubi ta.
Ku un bos fini e para a kontestá:
‘Paranan disfrasá, Yubi Chuchubi
no ta den su nèshi awe nochi
pa e no haña un halá di sota.
El a bai den mondi di infrou, bai siña kanta
kokoyoko pa kamuflá su bos.
Sigui e sonido i boso ta yega di mes.’
I berdaderamente,
te aleu ayá nan a tende kantamentu
di kokoyoko pa bai dilanti,
nan a sigui e sonido i nan a yega
serka pushipushi pa no avisá
Yubi Chuchubi i reda nan mes.
Di repente nan a bula sali
kla pa bula riba Yubi
topa Don Gayo Lindo
i Patricia Patu pechu ariba ta zoya
un merengue ku Dios di ta basta.

Kompader