Libertat

Di kon tin tantu nesesidat di bai bèk 300 aña pasá? Di kon no tin kurashi di biba awe i mira e realidat aktual bou wowo? Di kon kada bes kulpa bida di nos antepasadonan di orígen Afrikano pa loke ta pasando awor? Di kon no tin brio pa biba den presente i tuma responsabilidat propio?
Ta fásil pa kulpa pasado i otro pa erornan ku nos mes ta kometé awor, pero hasiendo esei nos ta keda tranká i pará mes un kaminda. Un kaminda di renkor, di odio, di dependensia. I no un kaminda di libertat.

Si nos ke rekordá nos pasado di kon no saka for di dje e parti tremendo ku nos antepasadonan desendiente di Afrika a laga pa nos komo nan herensia?
Nan perseveransia, nan alegria di bida, nan lucha pa libertat, nan FORSA?
Ta sigui mira nan komo víktima i nos mes tambe, en bes di hasi usu di e herensia menshoná.

Inhustisianan te ainda ta ser kometé, pero awor ta nos mes ta kometé nan. Kontra esnan ku no por defendé nan mes : kontra nos muchanan.

----------

mensahe di un antepasado

na kadena, lastrá for di mi tera
m’a siña pensa i kere
ku pa motibu di mi koló
mi ta ménos ku un kachó

tur ku tabata parsemi
m’a siña despresiá
den mi estado inferior
m’a hasi otro superior

asina m’a planta den historia
un simia ku ainda bo ta traga

pero ya no tin kadena
bo man bo pia no ta mará
bo ta liber pa realisá
ku bo tei pa eternidat

-----------

Nos man nos pia ya no ta mará. Nos no ta den un estado
inferior mas te pa hasi otro superior. Kambiando nos
manera di pensa i aktua , nos ta bira liber di bèrdat.

Diana Márquez