e pal'i kadushi

si un dia bo kana pasa
band'i un pal'i kadushi
para un ratu serka dje
i pa un momentu bo kontempl’é
lo e kontabu su historia
ku atenshon bo mester skuch’é

lo e kontabu di e solo
ku tantu a kim’é
di e set ku a torment’é
ora awa seru lubid’é
di tur e orkannan ku a maltrat’é
i tambe dje luna ku a karisi’é

lo bo mira sali fo'i su sumpiña
un gota di awa : un lágrima
pero ku su brasanan den laria
e ta pidi forsa i bendishon

mas lo bo mira kon e kadushi
maltratá i tormentá
a keda firme den su meta :
lo no tin nada pa tumb’é

Diana Márquez