Nos hendenan den spòtlait

Ruviana Zimmerman, kordinadó eksposishon:
Beto Adriana 50 aña triunfo deportivo. Gran deportista, gran yu di tera!

Ruviana Zimmerman, ta un hóben, studiante di Fakultat Sosio Ekonómiko na UNA, siguiendo e estudio di Management Business Communication i ta den su di 3 aña di estudio. Banda di su estudio, Ruviana ta prepará pa su karera profeshonal trahando komo boluntario na Museo Nashonal di Arkeologia i Antropologia (NAAM). Na NAAM ya pa un aña e la sa di yuda den diferente proyekto i ta fungi komo kordinadó di proyekto na e museo. E proyekto eksposishon Beto Adriana ta e promé proyekto ku e hóben aki ta karga riba su nòmber i ta e trèker di e proyekto aki.


Pa e hóben aki e eksperensha ta unu grandi e inolvidabel. “ Mi a haña enkargo di e direktora di NAAM pa karga e proyekto Beto Adriana. En prinsipio mi no tabata tin idea di kon grandi e proyekto aki lo ta. Mi no tabata sa ken ta Beto Adriana. Pero na momentu ku mi a profundisá den logronan di e deportista aki, mi a kria un sentimentu speshal pa logra pone un eksposishon na honor di e héroe nashonal aki. E lucha pa haña fondo tabata unu fuerte pero al final, ami i e komishon, ku a ser forma a logra di hinka e eksposishon aki den otro. Mi a traha 2 luna largu riba e proyekto aki, kombinando e ku skol i tambe djòp. Fin di siman i tin dia te ku mardugá nos tabata traha huntu riba e proyekto. Mi a hasi e ku hopi dedikashon i apresio. Awor mi ta satisfecho ku nos a logra nos meta. Mi tabata tin un tim, ku mi ta sigur ku sin nan lo mi no por a logra”. E hóben aki sin duda a sa di demostrá di ta kapas di karga ku un proyekto grandi manera esun aki. Ruviana despues di e proyekto aki lo sigui ku diferente otro proyekto na NAAM. E la sa di pone su konosementu di teoria organisatorio den práktika, ku kual e la sa di kosecha éksito.



Ainda tin oportunidat pa pasa bishita e eksposishon interesante i edukativo di nos héroe nashonal Beto Adriana. E eksposishon ta na SDK i ta habri di 20 pa 30 yüli 2005, for di 9 –12 i di 2 –7 or.