Studiantenan na Kòrsou: Mi mes negoshi.

Mi yama Guido Rojer i mi tin aworakí 16 aña di edat. Resientemente mi a kaba HAVO na M.I.L. ku e pakete Natuur en Techniek.

Ami a skohe pa studia na Kòrsou. Dor ku mi ta yòn, si mi a bai Hulanda lo mi no a haña un kamber. Lo mi mester a biba serka famia i esei mi no tabata tin gana. Mi tin hopi famia na Hulanda si, pero na Hulanda lo mi a kier a biba riba mi mes pa mi bira independiente.

Mi a kuminsá wak e posibilidatnan ku tin pa sigui studia aki na Kòrsou. Mi promé eskoho tabata Civiele Techniek / Bouwkunde na Fakultat Tékniko di UNA. Pero despues mi a kambia di idea i mi a skohe International Business na Fakultat Sosial Ekonómiko na UNA. Mi a papia hopi (via di MSN chat) ku mi tres primunan ku ta studia na Hulanda. Nan ta studia Civiele Techniek, Technische Bedrijfskunde i Bedrijfskunde.

Mi a sera konosí ku UNA durante di e siman di introdukshon. Esaki tabata di 2 te 7 di ougùstùs. Durante di e siman ei nos a hasi hopi kos: siña traha den tim, deporte, diskushonnan tokante di tópikonan den komunidat, atardi kultural, etc. Nos a pasa hopi leuk. Mi ta hopi satisfecho ku e manera ku e siman ei a bai i hasta mi tin idea pa partisipá otro aña komo mentor.

Lèsnan ta kuminsá dia 23 di ougùstùs. Pero mi no a sinta ketu. Mi a bini UNA huntu ku e studiantenan di Fakultat Tékniko ku a kuminsá ku lès for di 9 di ougùstùs. Mi a bishita biblioteka i campus pa prepara mi mes.

Ora mi kaba mi bachelor International Business mi tin deseo di sigui ku master (MBA) den eksterior. Durante e bachelor International Business ya kaba lo tin lèsnan ku tin ku wòrdu siguí den eksterior (Hulanda i Merka). Mi soño ta ku mi por jega asina leu ku mi por lanta mi mes negoshi. Mi ídolo ta Donald Trump, mi a sigui su historia na televishon i esei a impreshonámi.

Guido Rojer