Ònderstant

Shimis di kanchi,
tur na puiru,
peluka skeins riba su kabes,
Katán a pasa bela haltu
sin mira Ia su komader
ku ken e’n ta parti un pan.

“Ma Katán,
ta ki m’a hasibo,
ta kon tin tantu purá,
ta la muerte ta bo tras?”

“Atá Shon Ia,
mi no a mirabo,
ta mané b’a bira mas guepi
ku bo tabata.”

“Bai na moula, mala yerba,
guepi mes mané mi ta,
tur anochi mi ta haña
un bon zoyá.
Pero ta unda ta bai
tantu hanshá?”

“Wèl Ia, bo mes sa,
awe ta dia di paga ònderstant.
Mané gobièrnu ta awendia
ta mihó bo bai kobr’é tempran.”

“Ta kua ònderstant
bo ta bai kobra?
Un ta traha mas den kushina
serka e Chino na Brievengat?”

“Ta fo’i bo snùit,
unda mi ta traha o lag’í traha,
bo ta masha prufiá.
Ta Chichi mi yu
ku ta traha na Soshale Zaku,
t’e a regla e asuntu ei.”

“Un miserabel shen florin?”

“Awèl e ta yuda kumpra
maske ta dos Tilín.
Huntu ke dòsplaka ku
Win ta dunami i e sèn
di djòni kek,
e ta sera un bon boká.”

“Si sobra algu
despues di kasino
kaminda mi ta mirabo
tur siman.”

“Esei ta mí asuntu
ta pa mi wak si e sèn
por rende mas.
Pero Shon Ia,
mi ta sigui
pa mi no yega lat.
Pasa plasa dal un guiambo
p'e chanchan ei bola
un tiki mas.”

“Den bo kriki, mala lenga,
bai ku Satanas.”

Kompader