Yuchi Hesus

Fiesta di Pasku ta fiesta
di kome yena barika
hala rosea i sigui kome
te na punta di arohá
o di desmayá bentá
pariba di kas
pa kompensá e echo
ku yuchi Hesus den su pesebre
no ta tin nada otro di kome
ku kou riba un pida yerba seku
wardando riba e tres reinan
ku lo a trese tur sorto di prenda
aparte di algu pa kome
(pero esei e pober yuchi no por a sa).

Unda ku bo bira
tin kos di kome salu:
ham, sùlt, pekelé, salmou
na lugá di kome salú
un tentashon pa esnan
ku nan preshon no ta bon
ata si bo no ta mete ku porko
ta kos di hasibo loko
ayaka pa desayuno
un kada mainta saká
for di frizer blo bashí
mas fásil ku drecha
dos snechi pan ku keshi.

Paña nobo pa bai misa
esun biaha ei pa aña
sinta henter un dia na pelukeria
pa e peinado lusi ora kana
bai dilanti pa risibí e yuchi
ku trintetres aña despues
lo muri na krus
(pero esei e pober yuchi no por a sa).

Un peinado di por lo poko
tres shen heldu en efektivo
ku ni un bientu di orkan
lo por brua ni lòs e pidanan
falsu konopá riba kráneo
pa duna hende doló di kabes.

Asina un fiesta sagrado i humilde
a bira un fiesta di abundansia
gasta plaka pa no kaba
sin kòrda ku ora aña bòltu
tin trinta dia mas ku a sobra
pa yora malai
(pero esei yuchi Hesus no por a sa).

Kompader